قصة ( اخيرا قابلتك ) الحلقة الثانية عشر رومنسية اوي

{ ريــم } : سلامتك يامازن انا ريم و بعدين انت ناسي انك عرفتني من الشات
{ مازن } : بجد انا مستغرب اوي "" سوري يا ريم اصل انتي بتقولي كنتي قاعده مع شهنده امبارح و بتتكلموا عن الاغنيه و قلتلها انك عايزه عريسك يغنيهالك يوم فرحك انا كنت ماشي مع احمد امبارح و قلنا نفس الكلام و الله و انا بلساني قلتله دي اغنيه تحفه انا لو اتجوزت واحده بحبها هغنيلها الاغنيه دي يوم الفرح و الله الكلام ده حصل و امبارح عشان كده شكيت انك ممكن تكوني احمد و بتلعبي بيا او بيلعب بيا مش عارف
{ ريــم } : ههههههههه غريبه اوي
{ مازن } : لا ما هي المصيبه ان دي مش اول حاجه غريبه بتقوليها انا حاسس انك عايشه معايا كل حاجه تقريبا بتعمليها انا بعملها و كل صفاتك شبهه صفاتي انا مستغربك اوي يا بت انتي مين؟؟؟
{ ريــم } : تااااااااااني" ياابني و الله انا ريم
{ مازن } : ماانا عارف يا ستي انك ريم طب بلاش مين طلعتيلي منين و ازاي عرفاني كده انا مش فاهم حاجه
{ ريــم } : و لا انا فاهمه بصراحه
{ مازن } : انتي يمكن مش واخده بالك بس انا واخد بالي كويس انها مش اول مره نتفق في حاجه يمكن موضوع الاغنيه ده حاجه تافهه و بسيطه ممكن تعدي بس دي لو اول مره"" لكن فعلا ده كتير
{ ريــم } : طب يعني و دي حاجه وحشه اننا شبهه بعض؟
{ مازن } : مش عارف... اقصد لا ..اه .. لا مش عارف انتي حيرتيني و انا اسف معلش عاللخبطه اللي عملتهالك دي
{ ريــم } : و لا يهمك
مازن من بعد ما اتعرف علي ريم و بعد فوات شهرين تقريبا علي كلامهم مع بعض اللي منقطعش و لا يوم غير ايام الامتحانات و ايام سفره لكن قدرت تشغل تفكيره بطريقه مرضيه لدرجه ان صحابه و اخواته بدأوا يلاحظوا عليه حاجات غريبه عمرهم ما شافوا مازن كده كمان بقي لازق في البيت علي طول مبيخرجش كتير مع انه مبيطقش قاعده البيت
و في يوم كان ماشي مع وليد صاحبه
وليد ماشي طول الطريق يرغي و يكلم في مازن و مازن مكنش معاه خالص
وليد: امبارح كان حته يوم فاتك نص عمرك كان في خناقه جامده موت في شارع سعد زغلول عارف الواد مصطفي" فضح البت اللي بتمشي معاه و اخوها جيه و ابن عمها و كان مولد ياابني طلع واد قليل الاصل واطي و الله كلنا كنا فاكرين انه بيحبها بجد دي لو اخته يرضي يعمل فيها كده
مازن في دنيا تانيه و عمال يكلم في نفسه
**ايه اللي بيحصلي ده انا ليه مشغول بيها كده ده انا لسه عارفها من شهرين و كمان لا شفتها و لا اعرف عنها حاجه طب ازاي مشغول بيها كده عملتي فيا ايه يا ريم ازاي مش قادر ابطل تفكير فيكي ازاي انتي شبهي في كل حاجه كده انا تعبت البنت دي غريبه فيها كل حاجه انا بتمناهاا في البنت الذكاء و الاخلاق و التدين الاحترام كل حاجه لا و ايه الحاجه اللي مكنتش لاقيها في اي بنت انها بتفهمني اوي و كلامها زي كلامي و صفاتها زي صفاتي طلعتيلي منين يا ريم ازاي مش قادر اخرجك من دماغي انا هتجن
يقاطعه وليد بصوت عالي بعد ما نده عليه خمس مرات و لا حياه لمن تنادي
{ ولــيد } : مازن انت يله مازن ماااااااااااااازن وله
{ مازن } : و اخيرا حس بوجود وليد معاه: ايه في ايه فاتح جعورتك ليه حد قالك عليا اطرش
{ ولــيد } : و حياه امك انا بقالي ربع ساعه بتكلم و انت مش معايا خالص و بقالي خمس دقايق بنادي عليك و مش سامعني مالك؟
{ مازن } : ماليش
{ ولــيد } : في ايه يله انطق و الله شكلك بتحب جديد
{ مازن } : بحب بحب ازاي يعني لا طبعا احب مين
{ ولــيد } : يخربيتك و الله شكلك واقع كمان لشوشتك احكي ياض اخلص
{ مازن } : عارف انا اول مره في حياتي اعرف ان في حد شبهه حد في كل حاجه كده
{ ولــيد } : يا راجل
{ مازن } : هنبتديها تريقه من اولها هسيبك و امشي
{ ولــيد } : لا خلاص مين اللي شبهك دي؟
{ مازن } : هي ... هي مازن2
{ ولــيد } : مازن؟؟؟؟
{ مازن } : ايوه مازن 2 انا بحس انها انا
{ ولــيد } : طب هي مين و عرفتها ازاي و ازاي عرفت انها شبهك كده؟
{ مازن } : من النت
{ ولــيد } : نعم نت انت عبيط و لا بتسعبط؟
{ مازن } :انا بتكلم بجد و الله عرفتها من النت من شهرين" حاسس انها ملاك اول مره اقابل حد بالعقليه دي و الصفات دي او يمكن انا مدورتش مش عارف بس دي غريبه اوي
{ ولــيد } : طب شفتها؟
{ مازن } : هشوفها ازاي يعني طبعا مبتوريش حد صورتها انا حتي مكلمتهاش و لا سمعت صوتها
{ ولــيد } : لا يا شيخ لا كلمتها و لا شفتها و واقع علي بوذك من شويه كلام بتقراه بقي هو ده مازن اللي اول واحد بنجري عليه عشان مخه الكبير انت اكيد اتجننت او موهوم بحاجه عبيطه ال نت ال فوق يا مازن دي ممكن في الاخر يطلع ولد و بيلعب عليك و انت تقع فيه و تحبه
{ مازن } : انت بتقول ايه ولد ده ايه لا طبعا دي بنت انا متاكد انها بنت
{ ولــيد } : و متاكد منين يا فالح اذا كنت بتقول لا شفتها و لا كلمتها
{ مازن } : و هي ايه يعني اللي هيخليها تقول انها بنت و هي ولد
{ ولــيد } : و ليه لا يعني بتحصل كتير في ولاد كتير بيعملوا كده خلي بالك يا صاحبي و متتعلقش بالوهم ده اكتر من كده عيب ده انت مازن اللي كل الناس بتحلف بذكائه و تفكيره
كلمتين وليد دول زرعوا الشك في قلبه من ناحيه ريم لكن برده مش قادر يبطل تفكير فيها بس قرر انه يتأكد هي فعلا بنت و لا ولد بيضحك عليه روح و فتح لقاها فاتحه فضل متنح للاميل بتاعها حوالي دقيقتين مبينطقش و عمال يكلم في نفسه
**معقول تطلعي ولد ده انا اجيبك من تحت الارض يا ابن لا انا متاكد انك بنت مش ممكن و حتي لو انتي بنت انا ازاي و ليه اتعلقت بيكي كده طب و بعدين لو حبيتك بجد يا تري انتي هتحبيني طب و لو حبتيني هقول لاهلي ايه هقول لاصحابي ايه اذا كان وليد قالي كلمتين سلخني بيهم عشان حكتله عاللي حاسه ناحيتك امال ابويا و امي هيقولوا ايه و يا سلام بقي لو طلعتي في الاخر ولد يالهوي يالهوي يانا
{ ريــم } : ايه يا سي مازن طب سلم
{ مازن } : سوري يا ريم معلش
{ ريــم } : ازيك عامل ايه؟
{ مازن } : كويس الحمد لله
فضل ساكت حوالي دقيقتين مش عارف يتكلم يقول ايه و سرحان خالص و نفسه يطلب رقمها عشان الشك يخرج من قلبه بس ازاي
{ ريــم } : مالك يا مازن في حاجه؟
{ مازن } : لا مفيش ... لا بصراحه بقي في
{ ريــم } : في ايه؟
{ مازن } :: في اني بصراحه عاوز رقمك ممكن؟
{ ريــم } : رقمي ازاي يعني
{ مازن } : رقم موبايلك ايه مش معاكي موبايل
ريم: معايا بس عايزه ليه يعني مش فاهمه؟
{ مازن } : اصل ..اصل انا ... اه و افتكر ان الكابتن قاله في سفر الاسبوع الجاي لاسكندريه اصل انا هسافر الفتره الجايه دي كتير ايوه الكابتن قالي كده النهارده انا حتي مسافر الاسبوع الجاي و عاوز ابقي اطمن عليكي و اسال عليكي و كده بس
ريم اول ما سمعت انه مسافر الاسبوع الجاي حالها اتقلب و اتلخبطت و عنيها اتملت بالدموع لانها فعلا اتعودت عالكلام معاه و مبقتش تقدر يعدي يوم عليها من غير ما تكلمه ده غير ان كلامه بيريحها اوي تقريبا هو الانسان الوحيد اللي عايشه معاه و مش معاه لانها ليل نهار عالنت بتكلمه
{ مازن } : ها يا ريم هتديني الرقم
{ ريــم } : انت مسافر فين؟
{ مازن } : مسافر اسكندريه
{ ريــم } : و هتقعد قد ايه؟
{ مازن } : مش عارف بس احتمال شهر و هرجع علي بدايه رمضان
{ ريــم } : ياااااااه رمضان ده كده يبقي اكتر من شهر
{ مازن } : اه حوالي شهر و نص كده
{ ريــم } : هو السفر الاسبوع الجاي الاسبوع الجاي يعني و لا ممكن تتاجل
{ مازن } : لو اتاجل هيبقي يوم اتنين مش اكتر عالعموم انا اسف اني طلبت منك الطلب ده انا عارف انه سخيف و ممكن يشكك فيا بس انا بس كنت عايز اطمن عليكي لما اغيب عنك مش اكتر
{ ريــم } : لا بس يا مازن انا فعلا مش هينفع اديك الرقم انا اسفه
{ مازن } : و لا يهمك يا ريم بس بليز متزعليش مني انا عارف اني دايقتك
{ ريــم } : لا ابدا مدايقتنيش و لا حاجه انا اللي اسفه بس مش سهل كده اني اديك رقمي
{ مازن } : عارف طبعا خلاص و لا يهمك
مازن علي قد ما كان كلام وليد ماثر فيه لكن مقدرش يغير حاجه من تفكيره ناحيه ريم و برده كان من جواه متاكد انها مبتكدبش و انها فعلا بنت و انها نفس الشخصيه اللي رسمها جواه و مع ان رفضها انها تديه للرقم قلقه و زعله لانه كان نفسه يسمع صوتها و يشيل الشك من جواه الا انه فضل يلوم علي نفسه كتير انه طلبه منها بالجرأه دي
اما ريم فكانت برده مبتطبلش تفكير لكن مش زي تفكير مازن ناحيتها لكنها كانت بتفكر في انه هيسافر و ازاي هتقضي فتره سفره دي و هتكلم مين و مين اللي هيقدر يخرجها من وحدتها
**ياااااااه يا مازن هتوحشني اوي بس ازاي طلب مني الرقم بالسهوله دي و هو ليه بيعاملني كده و اشمعنه انا الوحيده اللي عايز يطمن عليها انا خايفه ليكون ___ ( بيحبها يعني )
يكون ايه انتي اتهبلتي هو شافك و لا يعرف عنك حاجه عشان يكون اللي في دماغك ده حصل
بس كل كلامه بيقول انه فعلا كده
مش عارفه بقي بس ده لو حصل دي تبقي كارثه
جيه اليوم اللي الكابتن قال فيه السفر بكره يا شباب وقع الخبر علي مازن و كانه جمره نار مع انه كان زمان بيستني وقت السفر بفارغ الصبر لكن المره دي غير اي مره ازاي مش هيكلم ريم الفتره دي كلها
{ مازن } : ريم انا مسافر بكره
{ ريــم } : ايه بكره؟؟
{ مازن } : ايوه بكره الكابتن قالنا النهارده
{ ريــم } : و هتسافر بكره امته؟
{ مازن } : باليل هنخرج من هنا عالساعه 11 كده
{ ريــم } : معقوله هتسافروا باليل كده
{ مازن } : عادي متعودين علي كده
{ ريــم } : ربنا يرجعك بالسلامه
{ مازن } : الله يسلمك
و سكتوا شويه و ريم بتفكر هتعمل ايه في غيابه و ازاي مش هتكلمه الفتره دي و فجأه اخدت قرار مهم جدا

شارك الموضوع

مواضيع ذات صلة